रांझू-फुलमूऐ दी काणी ( पहाड़ी च )

साड़ी पहाड़िया च लोककथां दा अपना दर्ज़ा है | बच्चे की जालू तकर दादी-नानिया ते कहानियां ना सुनणे की मिलन तालु तकर से माणु नई बणदा | अजकले दे माँ-पेओ अपने नयाण्याँ की अंग्रेजी-हिंदी स्खाला दे कन्ने बेचारी पहाड़िया की कोई पूछा-मंगा दा ही नई | खैर अज तुसांजो रांझू-फुलमू दी प्रेम कहानी सुनाने हां |

पाई गल बड़ी पुराणी है कोई 1870 दे नेड़े-तेडे दी | तालु जमींदारां दा राज चलदा था | सै राजे की टके (कर) किठे करि के दिंदे थे | अदेहे ही इक जमींदारे दा लौका मुण्डु था रांझू | सारा दिन फिरदा रेह्न्दा था पर अप्णियाँ मिठियां गलां कन्ने सारयाँ दा दिल मोहि लेंदा था | गलांदे न की रांझू बंसरी बड़ी छैल बजांदा था कि तिसदि बँसरिया दी तान सुनी करि कोई भी मदहोश होइ जाए | दुए पासे फुलमो थी गद्दन, छैल-छबीली पहाड़ी बांकीनार | जिसादा ना ही फुलमो था से कितनी सोणी होंगी !

फुलमो रोज अप्णियाँ सहेलियां कन्ने घाटे पर पानी भरना जांदी थी | इक दिन रांझू भी अपने मितरां कन्ने घाटे दे नेड़े फिरा दा था कि तिसदि नज़र फुलमो पर पई गई | नज़रां मिलदे ही दोनों इक दुए कि दिल देई बैठे जियां कोई पिछले जन्मे दे बिछड़े दे होण |

रांझू अक्सर पाड़े पर चढ़ि करी बंसरी बजांदा था | तिसदि बँसरिया दी तान सुनी करी पागल होइ फुलमो घरे कोई न कोई बाना लायी करी के तिस आल पूजी जांदी थी |

काँगड़े दिया उचिया रिड़िया बंसरी बजे हो........

डंगरयां जो चारदा रांझू मिंजो सद्दे हो.......

चुक्या घडोलू गोरी पाणिया चली हो

बँसरिया दी तान उद्दे दिल्ले लगी हो

काँगड़े दिया उचिया रिड़िया बंसरी बजे हो........

डंगरयां जो चारदा रांझू मिंजो सद्दे हो.......

रख्या घडोलु गोरिया घरे जाई के

अम्मा जो गलांदी आयी कम कमाई के

काँगड़े दिया उचिया रिड़िया बंसरी बजे हो........

डंगरयां जो चारदा रांझू मिंजो सद्दे हो.......

सजना ने मिली गोरी धारां जाई के

व्यहि करि लेई जा मिंजो घरे आयी के

काँगड़े दिया उचिया रिड़िया बंसरी बजे हो........

डंगरयां जो चारदा रांझू मिंजो सद्दे हो.......

साँझा दिया गोरी छम-छम  घरे आयी है

लेई जाणी रांझूऐं व्यहि करि के

काँगड़े दिया उचिया रिड़िया बंसरी बजे हो........

डंगरयां जो चारदा रांझू मिंजो सद्दे हो.......

बँसरिया दी तान उद्दे दिल्ले बजे हो

मीठी मीठी तान उद्दे दिल्ले लग्गे हो............

रांझू-फुलमो दे प्यारे दी ख़बर जालू तीना  दे घरे तकर पूजी तालु तीना दोनों दी तां शामत आयी गई | दोनों अपने घरे च ही कैद होइ गए |

रांझूऐ  दे पेयोएं अपने पंडते जो सद्दी करि गलाया कि छोड़ी-छोड़ी साड़िया बिरादरिया दी कोई कुड़ी तोप, असां अपना छोकरु व्याही लेना | पंडत कन्ने दे ग्राएं दिए इक कुड़िया दा रिश्ता लेइ आया | हफ्ते अंदर व्याह भी रखी दित्ता |

इक दिन फुलमो घरे ते नसी करी रांझूऐ दे घरे वाल चली जांदी | जालू से रांझूऐ दे घरे दे आलेदवाले दी बाड़ी च झांकी करी दिखदि है तालु तीसा कि पता लगदा है कि रांझूऐ दा तां व्याह लगया होणा | रांझूऐ कि तां लोक बुटणा मला दे |

बड़ुए सुगाड़ूएं तू कजो झांकदी

झाँका कजो मारदी

दो हथ बूटने दे लायाँ ओ फुलमो

गलां होइयां बीतियाँ

बुटना लुआन तेरी सकी चाचियाँ

तेरी सकी पाबीयाँ

जिनां दे मने विच चा ओ रांझू

गलां कियां बीतियाँ

बड़ुए सुगाड़ूएं तू कजो झांकदी

झाँका कजो मारदी

दो हाथ मेहन्दिया दे लायां फुलमो

दो हाथ मेहन्दिया दे लायां फुलमो

मेरा व्याह लगया

गलां होइयां बीतियाँ

कुन्नि बो बामणे तेरा व्याह पढ़या

रांझू ब्याह लिख्या

कुन्नि बो किती कडमाई हो रांझू

गलां कियां बीतियाँ

गलां कियां बीतियाँ

कुलें दे पुरोते मेरा व्याह पढ़या

फुलमो व्याह लिख्या

बापूएँ किती कड़माई फुलमो

गलां होइयां बीतियाँ

गलां होइयां बीतियाँ

जिनि बो बामने तेरा व्याह दिख्या

रांझू व्याह लिख्या

उसे दी ना पोए कदी पूरी रांझू

गलां कियां बीतियाँ

गलां कियां बीतियाँ

रांझूऐ दे व्याहे दियाँ रसमाँ निबदियां दिखी करी तीसा दा तां दिल टूटी जांदा है | से नठी करी बणे च जाइ के ज़हरीली जड़ी खाई लेंदी है | प्यारे दे बिछड़ने दे ग़मे ते हरी करी फुलमो अपनी जान देई दिन्दी है |

अगले दिन रांझू बारात लेइ करी दुए ग्राएं कि चलदा है | जालू से पलकिया दा पर्दा टाई करी पहाड़े दे दुए पासे दिखदा है तालु तिसकी कुसी दी लोथ लेइ के जांदे लोक दसदे न | से अपने कहारां जो पुछदा है, अपने बारातियां जो पुछदा है कि लोक कूदि लोथ लेइ करी चल्यो तालू तिसजो पता चलदा है कि तिसदे वियोगे च फुलमो अपनी जान देइ ती | से कहारां कि पालकी रखणे जो बोल्दा है | अपने रिश्तेदारां कि से फुलमो कि लकड़ी पाने बाद बारात लेइ के जाने जो गलांदा है | रांझू नठी करी दरयाए पारे शमशान पर पूजी जांदा है | अपने खब्बे हत्थे ने से लोथा पर पर लकड़ी राख्दा है कन्ने सजे हत्थे च लाम्बू पकड़ी के से फुलमू दी चिता चीणदा है | फुलमो दी चिता कि अग लायी के से चिता टके ही खड़ोतया रेंदा है | जालू चिता दी आग पूरी परचण्ड होइ जांदी है तालू रांझू चिता च छाल मारी दिंदा है |

उआरें-उआरें रांझूऐ दी जंज जाए

ओ लोको जानी जाए

पारें-पारें फुलमो दी लोथ लोको

गलां होइयां बीतियाँ

गलां होइयां बीतियाँ

रक्खा वो कहारो मेरी पलकिया

ओ मेरी पलकिया

फुलमो जो लकड़ी मैं पाणी लोको

गलां होइयां बीतियाँ

गलां होइयां बीतियाँ

बाएं हाथी रनझुए ने लकड़ी पाई

लोको लकड़ी पाई

दाएं हाथी फुलमो जो लाया लम्बुआ

गलां होइयां बीतियाँ

गलां होइयां बीतियाँ

प्रीत नी लाणी लोको कच्च्यां कन्ने

हो लोको कुँवारेयां कन्ने

व्याह करी हूंदे बेईमान लोको

गलां होइयां बीतियाँ

गलां होइयां बीतियाँ

रांझू-फुलमो जो जिन्दे जी तां समाजे इक नई होणा दित्ता पर आज भी पता नई कितने प्यार करणे आले इस समाजे दी पेदपाबे दिया अगा च जाली के मरी-मुकी गए | रांझू-फुलमो दी मिसाल तां हर पहाड़िए दी वफादारिया दी मिसाल है.....................